„Kon gauni ėš buočiu, ton ė tori, rēk tik neožmėrštė“

Šėndėin nuoro pasėrokoutė aplė Barnėškienė Rita – vėsū gerbama Plungės „Saulės“ gimnazėjės lietoviu kalbuos ė literatūras, luotīnu kalbuos ėr Antikas kultūras muokītuojė, ekspertė. Ana ne tiktās vākus muoka, bet ė kninguos sorašė ton, kas žemaitiou īr brongiausē. Ana īr žmuogos, katras sava šėrdi atvierė vėsims, vo anuos parašītė žuodē lėikt gėlē atmintie, primindamė mums, ėš kor mes esam kėlė ė kuoki dėdėlė īr mūsa kalbuos galė.

Barnėškienės Ritas asmenėnė albuma nuotr.

Barnėškienės Ritas asmenėnė albuma nuotr.

Barnėškienės Ritas asmenėnė albuma nuotr.

Par kalba atēn savėtoms ė karaktuorios

Rita gėmė Ragovėškiūs, Kretinguos rajuonė, auga Senuojuo Īpėltie, bėngė Kretinguos pėrma vėdorėnė. Ana jau muokīkluo žėnuojė, ka būs muokītuojė, tik svarstė, a matematikas, a lietoviu. Mama bova lietoviu kalbuos muokītuojė, vo vėdorėnie anon muokė poetė Lėniauskienė Bruonė, ta ė soagitava stuotė i pedaguogėni. Jau 38 metā Barnėškienė Rita īr muokītuojė ėr 30 metu gīven Plungie.

Ana pasakuojė, ka muokėnē vėsās laikās īr tuokėi pat: vėinė nuor muokītėis, kėtė – nē. Īr linksmū, atvėrū, paprastū, draugėšku, kūrībingu, īr ėr ožsėspīrosiu, diel vėskuo nepatėnkintu.